Tang aa chuke hain kash-ma-kash-e-zindagii se ham
Thukaraa naa den jahaan ko kahiin bedilii se ham


Maayuusii-e-ma'al-e-mohabbat naa puuchhiye
Apano se pesh aaye hain begaanagii se ham


Lo aaj hamane tod diyaa rishtaa-e-ummiid
Lo ab kabhii gilaa naa karenge kisii se ham


Ubharenge ek baar abhii dil ke val-vale
Jo dab gaye hain baar-e-Gam-e-zindagii se ham


Gar zindagii me mil gaye phir ittafaaq se
Puuchhenge apnaa haal terii bebasii se ham


Allaah re fareb-e-masahiiyat ke aaj tak
Duniyaa ke zulm sahate rahe Khaamoshii se ham


Ham Gam-zadaa hain laaye kahaan se Khushii ke geet
denge wahii jo paayenge is zindagii se ham