غزلوں کی دھنک اوڑھ میرے شعلہ بدن توُ

**sarfraz_qamar** · 09-08-2012, 02:12 AM

غزلوں کی دھنک اوڑھ میرے شعلہ بدن توُ
ہے میرا سخن تُو، میرا موضوعِ سخن توُ

کلیوں کی طرح پھوٹ سرِ شاخِ تمنا
خوشبو کی طرح پھیل چمن تا بہ چمن توُ

نازل ہو کبھی ذہن پہ آیات کی صُورت
آیات میں ڈھل جا کبھی جبریل دہن توُ

اب کیوں نہ سجاؤں میں تجھے دیدہ و دل میں
لگتا ہے اندھیرے میں سویرے کی کِرن توُ

پہلے نہ کوئی رمزِ سخن تھی نہ کِنایہ
اب نقطہِ تکمیلِ ہُنر محورِ فن توُ

یہ کم تو نہیں توُ میرا معیارِ نظر ہے
اے دوست میرے واسطے کچھ اور نہ بن توُ

ممکن ہو تو رہنے دے مجھے ظلمتِ جاں میں
ڈھونڈے گا کہاں چاندنی راتوں کا کفن توُ