کچھ نہ تھا زیست کے صحرائے بلا سے آگے

**sarfraz_qamar** · 12-08-2012, 11:57 PM

کچھ نہ تھا زیست کے صحرائے بلا سے آگے
پھر وہی دشت مِلا، حدِ فنا سے آگے

نارسائی ہی دُعاؤں کا مقدّر ہے اگر
مَیں نِکلنے کو ہوُں اب اپنی صدا سے آگے

اس کے دامن میں فقط اس کی اَنا ہوتی ہے
ہاتھ رہتا ہو سدا جس کا، عطا سے آگے

یوُں خلاؤں کے تجسسّ میں ہوں غلطاں جیسے
اِک زمیں اور بھی ہو ماہ و سہا سے آگے

مُجھ کو امکان کے روزن سے نظر آتے ہیں
نِت نئے ارض و سما، ارض وسما سے آگے

یہ کسی بھُولی ہوُئی یاد کی ہے رمز ندیم
اِک ہیولیٰ سا ہے کیا، موجِ صبا سے آگے