حسن سراپا ، عشقِ مجسم ۔۔ صلی اللہ علیہ و سلم

**intelligent086** · 10-10-2018, 02:07 AM

حسن سراپا ، عشقِ مجسم ۔۔ صلی اللہ علیہ و سلم
روئے منور گیسوئے پرخم ۔۔ صلی اللہ علیہ و سلم

سوز سراپا ، درد مجسم ۔۔ عاشقِ امّت ، شافعِ عالم
آنسو تیرے ۔۔ شبنم شبنم ۔۔۔ صلی اللہ علیہ و سلم

صاحبِ قرآں فخرِرسولاں خسروِدین ورحمتِ یزداں
بادۂ عرفاں ، ساقیٔ عالم ۔۔۔ صلی اللہ علیہ و سلم

سازِ ازل سے تارِ ابد تک ، ایک ترنّم ایک تلاطم
بربطِ جاری ۔۔۔ نغمۂ پیہم ۔۔۔ صلی اللہ علیہ و سلم

شوق کامرجع درد کامسکن شافعِ امت کیف کاضامن
حسن کا منبع عشق کا سنگم ۔۔ صلی اللہ علیہ و سلم

فرش سے ہے تا عرش اجالا ، ذرّہ ذرّہ نور کا ہالہ
ماہِ سراپا ۔۔۔ مہرِ دو عالم ۔۔۔ صلی اللہ علیہ و سلم

ائے کہ طبیبِ عالم امکاں چارہ گرِ بیماریٔ انساں
تو نے رکھا زخموں پہ مرہم صلی اللہ علیہ و سلم

سر میں سجودِ شوق کا طوفاں،آنکھوں میں سو ابرِ باراں
کوئے مدینہ اور یہ موسم ۔۔۔ صلی اللہ علیہ و سلم