a81.jpg
بدی کی راہ سے مجھ کو ہٹا دے یا اللہ
مطیع احمد مرسل بنا دے یا اللہ
تمام عمر حقیقت کو یہ بیان کرے
مری زبان کو وہ حوصلہ دے یا اللہ
جو میری نسلوں کا اب تک رہی ہے سرمایہ
دلوں میں پھر وہی الفت جگا دے یا اللہ
ہر ایک سمت جہالت کا بول بالا ہے
یہاں تو علم کی شمعیں جلا دے یا اللہ
تمام شہر میں، میں منفرد نظر آؤں !
تو میری ذات مثالی بنا دے یا اللہ!
ہر ایک لمحہ تیرا نام ہو زباں پہ مری!
تو مجھ کو اپنا دیوانہ بنا دے یا اللہ
ترے وجود کو تسلیم کر لیں منکر بھی!
کوئی تو معجزہ ایسا دکھا دے یا اللہ
تو اپنے پیارے نبیؐ رحمت دو عالم کی
دل رئیسؔ میں الفت جگا دے یا اللہ