انڈیا میں انڈین پریمیئر لیگ کے فائنل میں ایک انتہائی سنسنی خیز مقابلہ کے بعد راجستھان رائلز نے چنئی سوپر کنگز کو میچ کی آخری گیند پر تین وکٹوں سے ہرا دیا۔

سُوپر کنگز نے مقررّہ بیس اووروں میں پانچ وکٹوں کے نقصان پر ایک سو تریسٹھ رن بنائے تھے۔ اس کے جواب میں رائلز نےسات وکٹوں کےنقصان پر ایک سو چونسٹھ رن بنا لیے۔ ٹورنامنٹ میں سب سے زیادہ وکٹیں حاصل کرنے والے بالر سہیل تنویر اور ٹیم کے کپتان شین وارن نو نو رن پر ناٹ آؤٹ رہے۔

راجستھان رائلز نے ٹاس جیت کر چنئی سوپر کنگز کو پہلے بیٹنگ کی دعوت دی۔
رائلز کی طرف سے یوسف پٹھان نے زبردست آل راؤنڈ کارکردگی دکھائی۔ پہلے انہوں نے چار اووروں میں بائیس رن دے کر تین کھلاڑی آؤٹ کیے اور پھر چار چھکوں کی مدد سے انتالیس گیندوں پر چھپن رن بنائے۔ وہ رن آؤٹ ہوئے۔

چنئی سوپر کنگز کی طرف سے سب سے زیادہ رن رائنا کے تھے جنہوں نے تینتالیس سکور کیا۔ مہندر سنگھ دھونی انتیس رن پر ناٹ آؤٹ رہے۔
چنئی سوپر کنگزپارتھو پٹیل، وی شوراماکرشنن، سریش رائنا، مہندر سنگھ دھونی، سبرامنیم بدریناتھ، چمارا کپوگیدرا، ایلبی مورکل، منپریت گونی، مرلی دھرن، لکھشمی پتی بالاجی، مکھایا نتینی۔

راجستھان رائلز نیرج پٹیل، ایس اے اسنودکر، کامران اکمل، سہیل تنویر، شین واٹسن، محمد کیف، یوسف پٹھان، رویندرا جدیجا، شین وارن، مناف پٹیل، ایس کے تریویدی۔